Dapi che la disco Gallaria è vegnida serrada avant radund in mais n'ha Scuol betg pli ina discoteca. Gia avant radund 10 onns era vegnida serrada la penultima disco pervi da problems da canera – il Sounds, ch'era en possess da la vischnanca.
Ils petiziunaris fan propostas concretas per il Sounds
Ina gruppa da quatter abitants da Scuol cun Curdin Thomas a la testa ha uss lantschà ina petiziun. Sin lur pagina da facebook «Nova disco a Scuol» han els clomà si la mesemna suentermezdi lur 833 comembers, da sustegnair ils sforzs per ina soluziun.
Concret pretenda la petiziun dal cussegl da vischnanca:
- da far tut il pussaivel per che la disco Sounds sin Trü, ch’è en possess da la vischnanca, vegnia danovamain averta il pli baud che pussaivel. E saja quai er mo transitoricamain enfin ch’i exista in’autra disco a Scuol.
- da s’engaschar ed intermediar per che la disco Gallaria vegnia danovamain averta pli baud che pussaivel. E saja quai er mo transitoricamain enfin ch’i exista in’autra disco a Scuol.
- da sustegnair, promover e prochatschar mintga dumonda da fabrica, che prevesa la realisaziun dad ina discoteca en ina zona prevesida per ina tala gestiun sco p.ex. las zonas da mastergnanza en nossa vischnanca.
Tenor Curdin Thomas han ils petiziunaris er tramess ina charta a la vischnanca cun propostas concretas co reducir la canera per pudair avrir danovamain la discoteca Sounds.
Senza resultads datti suenter la petiziun in'iniziativa
Sche la petiziun na vess betg da cuntanscher la finamira giavischada saja la gruppa d’abitants pronta da lantschar in'iniziativa di Curdin Thomas.
RR novitads 17:00