Siglir tar il cuntegn

Engiadina Scuol ha la tscherna: 9 candidats per 6 posts

Nov candidatas e candidats sa mettan a disposiziun per ils sis posts en la suprastanza da Scuol. Uschia ha il suveran da la vischnanca la pussaivladad da tscherner.

Il simbol da Scuol. La funtauna siglinta tar la rondella avant Scuol
Legenda: Il simbol da Scuol. La funtauna siglinta tar la rondella avant Scuol RTR, Georg Luzzi

Ils 23 da settember ha il suveran da Scuol dad eleger la suprastanza communala. Per sis posts sa mettan a disposiziun nov persunas – tant da quellas ch'èn ensemen sin ina glista independenta sco er duas ulteriuras persunas.

Glista independenta cun set persunas

La glista independenta è vegnida publitgada da tut las partidas burgaisas en l'Engiadina Bassa di il president da la Partida burgais-democratica PBD Peder Caviezel. Tenor las partidas burgaisas giaja tar quest’elecziun per persunas e betg per partidas.

Perquai hajan els ramassà ils nums dals interessents da differentas partidas ed er da persunas independentas dad in partida politica.

Economia main interess per elecziuns communalas

La societad da commerzi e mastergnanza Engiadina Bassa n'è betg s’engaschada explicitamain cun candidatas u candidats en l'elecziun.

La societad saja qua per tut l’Engiadina Bassa e betg be per Scuol, di il president Claudio Andry. Commembers da la suprastanza che abitan a Scuol avessan gì la pussaivladad, ma quels na sajan betg vegnids activs.

Capo Fanzun vul vegnir reelegì

Il capo Christian Fanzun sa metta a disposiziun per in'ulteriura perioda.

Candidatas e candidats han la pussaivladad da s’annunziar per in post politic enfin al di da l’elecziun ils 23 settember 2018.

RR actualitad 08:00