Ins aveva spetgà dapli opposiziun areguard la lescha turistica. Vegnì èsi tut auter. Grazia a las duas sairadas d’infurmaziun il mais matg èn las undas sa calmadas. Las radund 60 persunas preschentas a la radunanza n'han fatg quasi naginas dumondas. Uschia ha la radunanza communala approvà la lescha da turissem cun sulettamain 4 cuntravuschs.
Las disposiziuns executivas vegnan approvadas da la suprastanza communala suenter la votaziun da la lescha turistica a l’urna, ils 24 da settember 2017. La lescha turistica va en vigur cun l'entschatta da l'onn 2018.
Ulteriuras approvaziuns
Sper l’approvaziun da la lescha turistica ha la radunanza communala consentì in credit da 20’000 francs per realisar ill plan da zonas da la fracziun da Ftan ed in credit da 45’000 per la scola da musica Engiadina Bassa.
La vischnanca da Scuol ha approvà il quint dal 2016. Cun entradas da 48,4 milliuns francs ed expensas da 47,9 milliuns francs hai dà in gudogn da 431’000 francs.
RR actualitad 07:00