Siglir tar il cuntegn

Header

Perspectiva ord l'aria da la punt da Gurlaina.
Legenda: La sanaziun da la punt da Gurlaina vegn a cuzzar anc pli ditg che planisà. Mayk Wendt
cuntegn

Scuol Co vinavant cun la punt da Gurlaina?

Sanar la punt cumplettamain che pretenda dentant ina demontascha da la punt existenta, construir ina nova punt, allontanar la punt ubain sanar la punt existenta cun tschertas concessiuns. Quai èn las quatter variantas preschentadas da la vischnanca da Scuol a chaschun da sia radunanza da rendaquint.

video
Co vinavant cun la Punt da Gurlaina a Scuol?
Or da sil punct dals 30.06.2020.
laschar ir

En sasez avevan ins prevesì da sanar la punt da Gurlaina per radund 2,2 milliuns francs. Curt suenter che las lavurs avevan cumenzà l'avrigl, han ins dentant puspè stuì far ina bloccada da construcziun. La raschun per questa bloccada sajan donns uschè signifitgants vid la punt, ch’ins haja da ponderar tut la chaussa anc ina giada da nov. Uschia ha la vischnanca infurmà.

Detagls pli concrets davart custs e duradas da las quatter variantas pussaivlas na dettia en il mument anc betg. La vischnanca saja ussa vidlonder a far tut ils scleriments necessaris, era cun ils uffizis pertutgads. La punt da Gurlaina ch'è 115 onns veglia, stat numnadamain sut protecziun.

La radunanza ha prendì cogniziun da questa fatschenta. Ella pretenda dentant avant ina pussibla dumonda da credit ina analisa da perits independents – per sclerir en detagl schebain ins ha fatg sbagls tar la planisaziun oriunda da la sanaziun da la punt.

Ulteriuras decisiuns ord la radunanza

Sper il rendaquint dal 2019 ha la radunanza era approvà in credit da 460’000 francs per puspè render accessibel la chavorgia da la Clemgia, ed ina contribuziun à fonds perdu per il Bogn Engiadina en l’autezza dad 1 milliun francs. Quai en connex cun las sfidas enturn il coronavirus.

Causa coronavirus era nagina festa dal 1. d'avust

Causa coronavirus era nagina festa dal 1. d'avust

Sco la vischnanca ha plinavant infurmà hajan ins decidì dad annullar en tut las fracziuns da Scuol las festas dal 1. d'avust. Tenor la vischnanca na saja ina tala festa actualmain betg realisabla e segira. Era annulladas èn las festivitads dal 1. d'avust a Valsot e Müstair.

RTR novitads 06:00

Artitgels legids il pli savens

Ir a sanester Ir a dretg