Radund 10.2 milliuns francs vul investir Scuol l’onn 2018. Grondas expensas èn previsas en las gestiuns aua sco era aua persa. Ma era en l’infrastructura ed en il sectur dal turissem vul la vischnanca investir. Dus credits han ils preschents dentant refusà: in per ina halla da parcar a Guarda ed in per in passagi tras la Val Lischana.
In sguard sin ils proxims tschintg onns
Il plan da finanzas da Scuol prevesa investiziuns da radund 40 milliuns francs ils proxims tschintg onns. Quai èn bunamain dus enfin trais milliuns francs memia bler per onn. En l'avegnir è il vitg sfurzà d’inoltrar mesiras, quai tenor il rapport dal preventiv 2018.
Las malauras dal 2015 e 2017
Oravant tut las malauras dal 2015 e dal 2017 han chaschunà gronds custs. Ussa seguan las mesiras da segirezza e quellas vegnan a custar radund quatter enfin otg milliuns francs en ils proxims onns.
Il quint current è egualisà
Il quint current prevesa ina perdita da radund 126’000 francs, quai tar entradas da 45.7 milliuns francs e sortidas da radund 45.8 milliuns.
Facturs anc intscherts
Dal 2018 vegnan introduids la nova lescha turistica ed il plan d’instrucziun 21, qua n'hajan ins anc nagina experientscha quai che pertutga las entradas e sortidas effectivas. Plinavant stoppia la vischnanca far quint ch'il deficit dal center da sanadad è pli grond che spetgà.
A la radunanza communala han eran preschentas radund 70 persunas.
RR novitads 06:00