Scumond per bikers a Samedan duai valair

Resistenza encunter questa decisiun datti surtut online, sin facebook. En diversas gruppas sa dostan adina dapli persunas cunter il scumond per bikes en il territori «Muntatsch» si sur Samedan. Era ina petiziun online è vegnida lantschada.

Charta geografica cun las 6 vias che duain esser scumandadas per ils mountainbikers

Legenda da maletgs: Las sis vias che duain esser scumandadas per ils mountainbikers. mad

Entant è tut la resistenza restada senza success.

Tenor Jon Fadri Huder, president communal da Samedan, vulan e ston els dentant prender serius questas reacziuns. Anc na san els betg co reagir di Huder. Il scumond è publitgà e duai valair. I giaja per proteger questa zona - tranter auter per proteger la senda ecologica che sa chatta en la spunda sut las sis vias serradas per bikes. Igl ha adina puspè dà conflicts e reclamaziuns. Il scumond è la reacziun.

Suprastanza n'è betg entrada sin propostas per schliar problem

Tenor Reto Franziskus da la cumissiun d'events e turissem a Samedan hajan els fatg pliras propostas a la suprastanza communala co schliar autramain il problem. In scumond saja la faussa via, di Franziskus. La glieud na vegnia betg a sa tegnair vidlonder. Quai vegnia a procurar per dapli conflicts.

cumbat

Legenda da maletgs: Cumbat online cunter la decisiun da Samedan. Facebook «Gegen Bikeverbot Muntatsch» / Screenshot RTR

El speria che las bleras reacziuns online fetschian squitsch sin la suprastanza communala.

Tenor in post sin facebook duai dentant avair lieu ina maisa radunda en il decurs da las proximas emnas.

RR actualitad 07:00

Nua vala il scumond?