Siglir tar il cuntegn

Header

audio
Mezdi: Scola Grevas San Murezzan – Provisori sin la Polowiese
Or da Actualitad dals 06.11.2019.
laschar ir. Durada: 3 minutas 11 Secundas.
cuntegn

Scola da San Murezzan «Polowiese» è lieu pussibel per provisori

La scola actuala da San Murezzan, la scola Grevas, ha entant 50 onns e na correspunda betg pli a las pretaisas dad oz. La vischnanca ha laschà far plirs studis ils davos 10 onns. Entant èsi cler, ch’i dovra in nov edifizi. Dapi l’avrigl 2019 è enconuschent il project victur d’ina concurrenza d’architectura per il nov center da furmaziun.

Il nov stabiliment per quest center cun ina dimensiun da radund 8’000 meters quadrat, duai vegnir realisà al lieu existent da la chasa da scola Grevas. Actualmain discurran ins d’ina investiziuns da 70 milliuns francs.

Vista sin Polowiese da surengiu
Legenda: A l'ur da la «Polowiese» duess vegnir realisà il provisori per la scola da San Murezzan. zisler.net

I vul blers cumpromiss

La cumissiun «Center da furmaziun Grevas» ha entant evaluà numerus lieus pussibels, nua che la scola pudess far midada durant il temp da construcziun. Il lieu il pli ideal saja tenor la cumissiun la plazza da Polo a San Murezzan Bogn. Previs fiss in provisori sin dus plauns cun ina surfatscha totala da 4’000 meters quadrat. En quellas localitads na fiss dentant betg prevesida ina sala da gimnastica ed era betg in’aula. Per il temp transitoric avess la scola da San Murezzan da chattar alternativas.

Opposiziun cunter ils plans da realisar ina scola provisorica sin la «Polowiese» è gia vegnida intunada durant la saira d’infurmaziun. Numnadamain da l’hotel Sonne, che sa chatta en vischinanza.

Dapli detagls davart il project na datti dentant betg. En in proxim pass vegn suttamess a la populaziun da San Murezzan il schaner u il favrer 2020 ina dumonda da credit per la planisaziun concreta dal project.

audio
Per tadlar curt e cumpact
ord Novitads dals 06.11.2019.
laschar ir. Durada: 1 minuta 10 Secundas.

RR actualitad 12:00

Artitgels legids il pli savens