Siglir tar il cuntegn
cuntegn

Engiadina San Murezzan vul trair a niz il schlantsch

Ils effects per il turissem da l'Engiadin'Ota èn positivs: dapli pernottaziuns, dapli giasts da la Svizra. La destinaziun vul ussa profitar vinavant dal schlantsch dals campiunadis mundials da skis da l'enviern passà

Legenda: Guardar il video Profitar dals campiunadis mundials da skis. Durada 02:15 minutas.
Or da Actualitad video dals 19.09.2017.

Prest 7% dapli pernottaziuns e passa 20% dapli giasts da la Svizra. Ed ils giasts han recepì sco fitg cordiala la regiun ospitanta.

Quai trais facits da l'enviern cun ils campiunadis mundials da skis en Engiadin'Ota. L'eveniment da renum mundial ha damai purtà fritgs per il turissem indigen. La destinaziun vul er en l'avegnir profitar dal schlantsch ch'ils campiunadis mundials han purtà en val.

Giasts da l'Asia

L'Engiadin'Ota vul dentant era profitar dal renum medial ch'ils campiunadis mundials han purtà. Ils giasts chinais sajan intgantads sch'els audian da la destinaziun ch'ha gia organisà 5 giadas campiunadis mundials da skis. Uschia vul ins profitar dal num ch'ins ha ussa en pajais sco la China, dian ils responsabels da la destinaziun.

Ins veglia però era regurdar ils giasts svizzers vi da l'eveniment gartegià dal favrer passà, quai cun campagnas che cuntegnan era quest enviern il logo dals campiunadis. Uschia è la destinaziun Engiadina San Murezzan optimistica da pudair profitar er en avegnir dals effects positivs dals campiunadis mundials da skis.

RR actualitad 17:00