Il project «Unisono» è vegnì selecziunà ord 15 differentas ideas inoltradas en occasiun da la concurrenza d'architectura. El adempleschia tenor ils responsabels il pli fitg las pretaisas per ina scola nova e moderna.
«Unisono» duai remplazzar la chasa da scola Grevas, ch'ha 50 onns. Plinavant duai el reunir tut las classas sut in tetg, da l'emprima fin la superiura. Actualmain va la quarta e tschintgavla classa a scola en ina chasa amez il vitg.
Trais facturs decisivs
Tenor la co-manadra da la scola da San Murezzan e commembra da la giuria, Daniela Gmünder-Frizzoni, hajan persvadì surtut las cleras furmas dal bajetg. Vinavant haja sia integraziun en la cuntrada urbana ed il fatg ch'il bajetg pussibilitescha in andament sumegliant a las structuras actualas fatg ina buna impressiun.
Actualmain pon ins contemplar ils differents models en la scola Grevas a San Murezzan. En il fratemp duai il project victur vegnir elavurà enavant en furma d'in preproject.
RR actualitad 17:00 / TSG 17:40