Siglir tar il cuntegn
Inhalt

Engiadina San Murezzan vul agid finanzial d'autras vischnancas

8.4 milliuns francs dapli duai la schanza da siglir a San Murezzan custar. Totalmain numnadamain radund 19 milliuns francs. Uss vul il cussegl communal dumandar las autras vischnancas schebain ellas èn prontas da sustegnair finanzialmain il project.

Project schanza da siglir San Murezzan.
Legenda: Ina visualisaziun dal project oriund per 11.5 milliuns francs. mad

Suenter 3 onns avess il suveran da San Murezzan puspè stuì decider davart il futur da la schanza da siglir. Ma i è puspè vegnì auter a San Murezzan. En sia seduta dals 31 mars 2016 n'è il cussegl communal betg entrà en la tractanda da l'emprima lectura.

Agid finanzial duai vegnir tschertgà

Sin ina moziun da la fracziun liberal-democratica ha il cussegl communal decidì cun 15 encunter 1 vusch da metter enavos la tractanda. Ed el ha dà l'incumbensa a la suprastanza communala ed a la cumissiun da schanza da far la dumonda a tut las 12 vischnancas da l‘Engiadin’Ota, schebain ellas fissan prontas da sa participar als custs totals da radund 19 milliuns francs u betg.

Cun quai sa retardescha il project d'ina nova schanza da siglir a San Murezzan vinavant. Ina votaziun anc quest’on na para betg realistic. Planisà fiss stà da laschar votar il suveran il zercladur davart il credit supplementar da 8.4 milliuns francs.