L'opposiziun cunter il project da la nova clinica Gut e l'hotel da sanadad sin l’areal Serletta Sid a San Murezzan cuntinuescha. Cunter la dumonda da bajegiar èn vegnids inoltrads 27 recurs. Quai ha la vischnanca da San Murezzan confermà a RTR.
Ils responsabels dal project han inoltrà questa primavaira la dumonda da construcziun, malgrà ch’il plan d’utilisaziun è anc davant il Tribunal federal. Ils vischins – oravant tut ils dus hotels da luxus Badrutt's Palace e Kulm – cumbattan davant dretgira cunter il project, surtut pervi dal volumen da l’edifizi planisà.