Siglir tar il cuntegn

Header

cuntegn

San Murezzan Tschierv sa perda en Cresta Run

En il chanal da glatsch a San Murezzan na van betg mo sportistas e sportists. Sco i para ha er in tschierv chattà venderdi saira la via en il chanal. La finala ha la surveglianza da chatscha stuì gidar l'animal ord la situaziun dischlplaschaivla.

Venderdi bun'ura han ils lavurers dal Cresta run inscuntrà tar lur controlla usitada in giast nunspetgà en la bobera natirala che maina da San Murezzan a Schlarigna. In tschierv sa chattava en la bobera.

audio
San Murezzan: In tschierv en il Cresta run
ord Actualitad dals 06.02.2021.
laschar ir. Durada: 1 minuta 39 Secundas.

En la bobera sa glischnava il tschierv sin il glatsch e na pudeva persul betg pli ord la bobera. Uschia saja l'animal er stà en panica, sco Martin Greenland dal Cresta Run ha ditg envers RTR. Ils collavuraturs dal Cresta Run hajan clamà immediat il guardiaselvaschina. Quel haja pudì tegnair calm l'animal cun sbittar ina suga enturn la corna dal tschierv, sco in lasso.

Er il veterinari saja vegnì sin il plaz, raquinta Martin Greenland vinavant. Lez haja dà ina squitta per quietar l'animal. Lura saja stà relativamain simpel da transportar davent il tschierv. Ensemen cun il guardiaselvaschina ed il veterinari hajan els uschia pudì deliberar il tschierv en il guaud.

Talas visitas na dettia propi betg savens en la bobera. Quai na saja en sasez betg in lieu nua che la selvaschina sa laschia vesair, agiunta Martin Greenland.

RTR actualitad 17:00

Artitgels legids il pli savens