Ils 27 settember da quest onn avess la populaziun da San Murezzan stuì approvar il credit da 2,9 milliuns francs per projectar il nov center da furmaziun Grevas. Quest onn na vegn quella missiva probablamain però betg pli suttamessa al suveran da San Murezzan, uschia Claudio Schmidt, il manader da l’uffizi da construcziun a San Murezzan.
Analisa d’ina firma externa
A l’ultima seduta dal parlament ha quel numnadamain decidì da laschar analisar il project da fund ensi. Las fracziuns da la PLD, la gruppaziun Next Generation ed er quella dals independents han pretais da sclerir las dumondas davart la grondezza ed er il lieu per il nov bajetg. Tenor Schmidt vegnia uss pia tschertgà ina firma externa che fetschia quell’analisa. Da quintar cun emprims resultats possian ins pir en plirs mais. Fin là stattan er salda las lavurs currentas – tranter auter la planisaziun dals provisoris durant il temp da construcziun da la nova chasa da scola a San Murezzan.
