Siglir tar il cuntegn
cuntegn

Engiadina San Murezzan: Sustegn finanzial per il turissem da sanadad

La novfundada Santasana San Murezzan SA stgaffescha en l'Engiadina ina nova purschida dal turissem da sanadad. Ensemen cun partenaris vegnan creads programs individuals per la reabilitaziun e per la prevenziun da malsognas dal cor.

maschina da controlla da cor
Legenda: Medizina da cor. RTR

Il chantun Grischun vesa in potenzial considerabel en las purschidas da l'economia da sanadad che s'orienteschan a la valurisaziun ed a l'export. Sco che l'uffizi per economia e turissem dal Grischun communitgescha giuditgescha el la purschida da la novfundada Santasana sco fitg positiva.

Perquai sustegnan tant chantun sco Confederaziun – en il rom da la nova politica regiunala – il svilup da las colliaziuns ed in'analisa da Santasana cun ina contribuziun da 82'000 francs.

Per la nova purschida dal turissem da sanadad collavuran instituziuns ch'existan gia en l'Engiadina. Ultra da las instituziuns medicinalas èn sa cunvegnids partenaris da l'hotellaria, da la parahotellaria e da differentas instituziuns da sport e da fitness ad ina cooperaziun contractuala.

RR novitads 09:00