Il cussegl communal da San Murezzan ha decidì suenter discussiun animada d'organisar sez l'infurmaziun turistica en vischnanca. Las sis plazzas da lavur vegnan integradas en la partiziun San Murezzan Turissem.
Nova organisaziun turistica
La decisiun è stada necessaria suenter la fundaziun da la nova destinaziun turistica da l'Engiadin'Ota. La raschun è ch'il circul sco purtader da la destinaziun fin qua vegn schlià. La nova organisaziun en furma da societad d'aczias pussibilitescha a las vischnancas da surpigliar sezza ils posts d'infurmaziun turistica en mintga lieu. Las vischnancas pon decider da laschar organisar l'infurmaziun entras la destinaziun u dad organisar sez l'infurmaziun.
Avantags per eveniments en vischnanca
La suprastanza communala ha argumentà en il cussegl communal che surtut sinergias durant eveniments en vischnanca sajan in avantag per la soluziun da surpigliar sez l'infurmaziun turistica. Sco punct negativ è vegnì menziunà ch'i saja pussaivel che mintga vischnanca cumenza puspè da lavurar per sasez e betg per tut la destinaziun.
Nagina separaziun da la destinaziun
Divers commembers dal Cussegl communal han argumentà che la decisiun da surprender sez l'infurmaziun turistica en vischnanca pudess vegnir interpretà sco separaziun da la destinaziun. Quai na saja betg il cas ha argumentà la suprastanta communala Regula Degiacomi che ha preschentà la fatschenta. La pussaivladad da surpigliar sez l'infurmaziun turistica en vischnanca saja explicitamain prevesida en la nova organisaziun da la destinaziun. Perquai na poss'ins betg discurrer d'ina separaziun.
Il cussegl communal ha la fin finala decidì da surpiglair sez l'infurmaziun turistica en vischnanca cun 10 vuschs encunter 6 vuschs.
RR novitads 21:00