San Murezzan reponderescha fusiun cun polizia chantunala

Sin il 2016 avess la polizia communala stuì vegnir integrada en la polizia chantunala. Il cussegl communal aveva prendì questa decisiun l’onn 2012. Uss dentant vul la suprastanza reponderar quest pass.

Post da polizia

Legenda da maletgs: Post da la polizia communala a San Murezzan RTR, V.Rominger

Memia bleras dumondas avertas

La suprastanza communala da San Murezzan n'è betg cuntenta cun il contract sco quai ch’el è vegnì preschantà da la polizia chantunala. «Puncts da dispita èn ils custs, la repartiziun d’incumbensas betg clera e la dumonda dal service public tar ina fusiun», ha ditg Michael Pfäffli, suprastant communal da San Murezzan.

Uschia avess San Murezzan per exempel da pajar per prestaziuns, che fissan tenor Michael Pfäffli cleramain incumbensas da la polizia chantunala. Tenor il contract previs n’avess la vischnanca era betg las cumpetenzas giavischadas en puncto multas. La suprastanza communala vul perquai anc ina giada suttametter l’affar al cussegl communal.

Decisiun duai crudar il matg

Il cussegl communal da San Murezzan duess uschia decider da nov davart 3 variantas: l’integraziun totala, quella parziala ni da mantegnair ina polizia communala autonoma. Il cussegl communal duess decider en la seduta da matg uschia ch'ils midaments pussaivels pudessan vegnir instradads per il 2016.