Dapi otg onns è la halla da chavaltgar a la riva dal lai da San Murezzan serrada. Suenter che differents projects d’utilisaziun han fatg naufragi ha la vischnanca decis l’onn 2018 da prender a mauns la planisaziun da sanaziun ed utilisaziun. Davart il credit decida il suveran.
Diever per occurrenzas culturalas
In team da planisaziun ha sclerì differentas pussaivladads co la halla ch’è in object da protecziun communal, po vegnir duvrada en il futur. La finamira saja da porscher en l'avegnir differentas occurrenzas culturalas e quai durant tut l’onn.
Critica davart priorisaziun e custs
Crititgà tar quest project vegnan differents puncts. Per l’ina dettia projects pli urgents, sco per exempel la chasa da scola Grevas, uschia il cusseglier communal Gian Marco Tomaschett. Per l'autra sajan ils custs dal entir project memia auts. Sper ils 1,5 milliuns francs per la planisaziun èn prevesidas investiziuns da radund 15,5 milliuns francs.
Object d’identificaziun
Il president communal Christian Jott Jenny è persvas che la halla da chavaltgar pudess daventar in object d’identificaziun per San Murezzan. Tenor el saja impurtant da pudair avair in local public utilisabel durant tut l’onn e per differentas occurrenzas en vischnanca.
Il suveran decida ils 26 da settember davart il credit da projectaziun dad 1,5 milliuns francs.