Siglir tar il cuntegn

Engiadina San Murezzan - petiziun per duvrar localitads da vischnanca

Las abitaziuns sa chattan en la chasa annexa da la halla da chavaltgar a San Murezzan. Dapi 2 onns èn ellas betg pli abitadas. Per la gruppa d’interess, che sa cumpona da differentas persunas da la sparta artistica, in lieu ideal per duvrar intermediarmain.

chasa annexa halla da chavaltgar
Legenda: L'object che la IG ArtSud duvrass gugent intermediarmain è la chasa annexa da la halla da chavaltgar RTR, V.Rominger

En Engiadin'Ota manca tenor la IG ArtSud spazi public nua ch'ins po realisar agens projects, s'inscuntrar per in barat u lavurar vi da projects ed ideas individualas. I dat bain localitads per prender a fit, quai dentant per auts tschains. Gist quai saja in problem.

Alf Bolt
Legenda: Alf Bolt, el ha lantschà la petiziun RTR, V.Rominger

Las abitaziuns en la chasa dasper la halla da chavaltgar fissan idealas per installaziuns d'art, sco lieu d’inscunter nua ch’in barat cultural po avair lieu, quai tenor Alf Bolt ch'ha lantschà la petiziun e che maina la gruppa.

Bolt è da Champfèr, posseda in affar ed è sez artist ed uschia adina en tschertga da localitads adattadas. Quai saja dentant tut auter che simpel, di Bolt. Tenor las retschertgas fatgas da la IG ArtSud sajan las abitaziuns vidas a San Murezzan Bagn las unicas localitads en possess da la vischnanca, ch'èn disponiblas il mument.

Vischnanca blochescha

Da la vischnanca ha Bolt survegnì mo respostas negativas sin sias dumondas schebain ins dastga duvrar las abitaziuns. Sin quai ha el lantschà la petiziun.

Tenor il president communal da San Murezzan, Sigi Asprion, sajan questas abitaziuns en in stadi che permettia per motivs da segirezza betg da laschar ir èn insatgi.