Siglir tar il cuntegn

Header

cuntegn

San Murezzan Parlament refusescha sanaziun da halla da chavaltgar

Cun ina decisiun pez a cup dad otg cusseglieras e cussegliers encunter set, ha il parlament da San Murezzan decis da betg recumandar a la populaziun d'approvar la dumonda da credit da 15,3 milliuns francs. Quai per realisar il project per transfurmar la halla da chavaltgar en in center da cultura ed inscunters.

Menziunads èn surtut vegnids dubis sche San Murezzan pudess insumma prestar ina tala investiziun. Quai surtut en vista a projects pendents sco la chasa da tgira Du Lac, la chasa da scola u er investiziuns en la chanalisaziun che fa da basegn.

Il project da sanaziun

Avrir la box Serrar la box

Il project da sanaziun per la halla da chavaltgar prevesa da mantegnair la substanza existenta dal bajetg e drizzar en ella sco local per events culturals. Or da l’anteriura stalla da chavals vegniss realisà in bistro ed ulteriuras localitads. Ultra da quai è vegnì elavurà sper il project da sanaziun er in concept da gestiun.

La halla da chavaltgar dal 1910 è serrada dapi nov onns or da motivs da segirezza.

Sch'il project vegn realisà per 15,3 milliuns francs u betg, decida la populaziun a l’urna ils 27 da november 2022.

Chasa da parcar Quadrellas

Ina discussiun animada ha il parlament da San Murezzan er gì areguard la missiva per la sanaziun da la chasa da parcar Quadrellas.

chasa da parcar
Legenda: La chasa da parcar Quadrellas a San Murezzan duai vegnir renovada e sanada. Marie-Clair Jur

Quella è en in nausch stadi e duess vegnir sanada per 9,1 milliuns francs. Surtut discutada è vegnida la dumonda sche San Murezzan vegn ad avair avunda plazzas da parcar durant il temp da construcziun che duess cumenzar la stad 2023. Il cussegl communal da San Murezzan recumonda a la populaziun d'approvar questa dumonda da credit a l’urna ils 27 da november 2022.

audio
Per tadlar: curt e cumpact
ord RTR Audio dals 30.09.2022.
laschar ir. Durada: 1 minuta 11 Secundas.

RTR novitads 22:00

Artitgels legids il pli savens