Siglir tar il cuntegn

Header

cuntegn

Engiadina San Murezzan - nova staziun cun bella vista

San Murezzan inaugurescha la staziun da la Viafier retica. En ils ultims quatter onns è quella vegnida adattada als basegns d’ozendi.

Il 1903 è vegnida fabritgada la staziun da la Viafier retica a San Murezzan. Adina puspè en vegnidas fatgas singulas sanaziuns, ma la gronda sanaziun è succedida ils davos quatter onns. 66 milliuns francs han ins investì en la nova infrastructura moderna ed adattada al temp d’ozendi.

La pli gronda novaziun è l’autezza dals binaris adattada, quels èn tenor ils basegns da persunas cun impediments. Plinavant han ins investì en la tecnica, ed ina part da la staziun ha ussa in tetg. Uschia na ston ils viagiaturs en avegnir betg pli spetgar sut tschiel avert.

La gronda finamira – preschentar il panorama

La vista en direcziun dals lais da l’Engiadin’Ota è extraordinaria, e quella vista han ins resguardà cun projectar la nova staziun. Ils viagiaturs sortan dal tren en direcziun dal terminal dal bus, e vegnan surprendids d’ina vista bellischma sin las muntognas, sin il lai e sin la cuntrada en direcziun Malögia.

audio
Bunura: Nova staziun a San Murezzan
ord Actualitad dals 26.08.2017.
laschar ir. Durada: 2 minutas 36 Secundas.

Gronda festa d'inauguraziun

L’emprim tren «InterRegio», viadis cun trens istorics, guidas da giasts, in simulatur da tren, ustaria e bler auter spetgan ils aspectaturs da la festa d’inauguraziun ils 26 d'avust 2017.

Artitgels legids il pli savens