La scola da skis a San Murezzan è vegnida fundada l'onn 1929 da Giovanni Testa. Quai sin incumbensa da la societad da cura e traffic San Murezzan e dal club da skis Alpina San Murezzan. Tschintg onns suenter è lura vegnida fundada l'uniun svizra da las scolas da skis.
Diversas innovaziuns èn naschidas a San Murezzan
Giovanni Testa è stà quel um ch'ha sviluppà la tecnica dad ir cun skis «natirala». La gruppa da cursa «Guardia Grischa» ha festivà divers success grazia a questa tecnica, tranter auter era Edy Reinalter vegnì campiun olimpic dal 1948. E quai malgrà che questa tecnica na vegniva ditg betg renconuschida da l'uniun svizra.
Dal 1982 ha lura Roberto Trivella fundà la scola da skis per tschorvs e la fundaziun che finanziescha quella.
Boris – the ski school assistant
Per il giubileum da 90 onns vuleva la scola da skis da San Murezzan far insatge spezial. Uschia è naschida l'idea da far in film. Quel tematisescha tut ils aspects da la scola da skis cun metter en il center Boris, che vegn da la Russia sco assistent dal schef Bruno Marinoni a San Murezzan. Tenor Marinoni sajan las lavurs vi da quest film stads fitg spontans e senza script. Ins haja investà var 30'000 francs. Oz venderdi saira è la premiera.
RTR actualitad 17:00