Siglir tar il cuntegn
Inhalt

Engiadina San Murezzan – inundaziun d’in ual cun consequenzas

Cun pumpar aua or d’in tschaler inundà hai dà in ulteriur accident. Pliras persunas èn vegnidas blessadas ed han stuì vegnir manadas al ospital.

Ins vesa in areal da fatschenta cun material da bajegiar ed autos. Il terren è inundà.
Legenda: L'areal da fatschenta inundà a San Murezzan Bogn. MAD

Glindesdi saira è l’aual Ovel da Staz i sur la riva ed ha inundà l’areal d’ina fatschenta a San Murezzan Bogn. Sin quai han ils pumpiers ch’èn vegnids alarmads pumpà giu aua e cun quai probablamain chaschunà in ulteriur accident.

Mardi avantmezdi ha la polizia chantunala survegnì l’annunzia che pliras persunas en quai conturn hajan problems da respirar. Tenor emprimas retschertgas era sortì monoxid carbonic ord in agregat ed entrà en trais chasas abitadas. Quel agregat era vegnì dovrà per pumpar aua ord in tschaler inundà.

Tschintg persunas lev blessadas èn vegnidas transportadas en l’ospital a Samedan e duas persunas cun blessuras pli grevas a Cuira. Per consequenza èn las chasas en la vischinanza vegnidas evacuadas. Ils pumpiers da San Murezzan e Schlarigna èn stads l’entira notg ed era il mardi en acziun. Ils donns muntan a plirs milliuns francs.

RR novitads 16:00