Suenter l'onn passà ha la pandemia sfurzà era quest onn ils organisaturs dal Concours Hippique d'enviern a San Murezzan da desdir l'occurrenza. Il comité enturn Ladina Meyer ha dentant mess en pe in program alternativ. In'emna entira cun trenaments da siglir sur obstachels, skijöring e sco punct culminant in Horse Snow Cross.
Jau hai spetgà cun 20 fin 25 chavals, annunziads s'han dentant il dubel, quai fa plaschair.
Il Horse Cross, quai è ina disciplina nua ch'ils participants van a sella dad ina plazza da siglir fin tar la prosma. Il Snow Horse Cross cumenza damai a San Murezzan, maina a Schlarigna, Bever e lura enavos a Samedan. Ils chavaltgaders e las chavaltgadras vegnan ad esser en viadi trais fin quatter uras.
Per ils chavals na vegn quai ad esser nagin problem, forsa plitost per las chavaltgadras ed ils chavaltgaders.
Las reacziuns sin il program alternativ sajan stadas positivas. Perquai ponderescha il comité d'organisaziun da schlargiar il program dal Concours Hippique d'enviern en avegnir – e da porscher in'emna entira cun occurrenzas, trenaments, skijöring ed in cross.