Il president da la societad cinefilm, Diego Schwarzenbach, ha pudì annunziar a chaschun dal film «Zwischensaison» ch'è vegnì mussà ils 29 da november en la sala da teater dal hotel Reine Victora, che questas localitads possian vegnir duvradas era vinavant sco lieu da kino. Dentant è questa soluziun mo in provisori. Ins fetschia ina giada quint da restar en questas localitads per bunamain trais onns ed ins saja a medem temp era vidlonder da chattar ina soluziun a lunga vista, ha ditg Schwarzenbach.
Pia han ins cuntanschì la finamira, numnadamain da puspè porscher sin la mesadad da december ina pussaivladad d'ir a kino a San Murezzan.
Era quai che pertutga la gestiun dal nov kino duai tut restar sco quai ch’i era en il Cinè Scala, l’anteriur kino che ha gì da serrar sias portas avant bunamain trais mais causa ina demissiun da contract dal edifizi. Nov gestiunari dal kino è numnadamain l’anteriur mainagestiun dal Cinè Scala, Gianni Bibbia.
I saja dentant pussaivel ch'il kino restia serrà singuls dis u era emnas, causa autras occurrenzas culturalas en il hotel.