Siglir tar il cuntegn

Header

cuntegn

Engiadina San Murezzan - 3,6 milliuns per stallas da chavals

En sia sesida ha il cussegl communal da San Murezzan deliberà la missiva per renovar las stallas da chavals. La populaziun vegn a decider l’onn proxim.

Il cussegl communal vul laschar renovar las stallas da chavals a San Murezzan. Las stallas èn situadas a San Murezzan Bogn en vischinanza dals lieus, nua che las differentas occurrenzas da chavals han lieu durant la stad e l’enviern.

I sa tracta da 51 boxas per chavals en duas stallas che duain vegnir colliadas ina cun l'autra. Dals custs da 3,6 milliuns francs, ch’il project preveda, ha da decider il suveran da San Murezzan l’onn proxim.

Rino Padrun è per in onn il pli aut da San Murezzan

En pli ha tschernì il cussegl communal unanimamain a Rino Padrun sco nov president. Padrun è da la partida liberal democratica svizra è dapi sis onns commember dal cussegl communal. El succeda ad Arno Wyss, GdU, da Champfèr, en uffizi. Vicepresident è Fritz Nyfenegger dal PCD.

Padrun maina dapi il 2014 la banca Julius Bär a San Murezzan. El è s'engrazià per la tscherna ed ha ditg ch'el sa legra sin in onn interessant e constructiv.

RR novitads 06:00

Artitgels legids il pli savens