En il territori da Promulins, a l'ur da Samedan, posseda la vischnanca burgaisa bun 10’000 meters quadrats terren da construcziun. Questa parcella era vegnida tractada avant onns sco lieu pussibel per ina halla da glatsch regiunala. In'idea ch'ils burgais da Samedan avevan dentant refusà. Causa la mancanza d’emprimas abitaziuns pajablas en la regiun, saja la vischnanca burgaisa interessada tant dapli da realisar lieu abitabel per indigens a Samedan, uschia Claudia Nievergelt, la suprastanta da la vischnanca burgaisa da Samedan.
Elavuraziun da plan da quartier
La parcella purschess lieu per var 70 abitaziuns. Premissa per realisar quellas, saja d’elavurar in plan da quartier, per pudair inoltrar silsuenter in project. Per quel vulan ils Samedrins lantschar ina concurrenza d'architectura. La finamira saja ch'ina giuria decidess il 2024 en chaussa, uschia ch'ins pudess cumenzar cun la construcziun l’onn 2025. La radunanza da vischins da Samedan ha approvà cun vusch unanima 520'000 francs per la planisaziun d'ina surfabricaziun Promulins.
