Engiadina - Samedan na vul betg co-finanziar la schanza olimpica
San Murezzan aveva infurmà davart ils plans d’ina nova schanza da sigl e dumandà a tut las vischnancas da l’Engiadin’Ota, sch’ellas fissan prontas da co-finanziar la schanza olimpica en il senn d’in project regiunal.
Il cussegl communal da Samedan haja chapientscha per la dumonda da San Murezzan ch' era naschida suenter ch’ils custs da projectaziun d’ina nova schanza èn s'augmentads marcantamain.
Nagin project d’interess regiunal
Dentant na part ins betg l’opiniun da San Murezzan, ch’i sa tracta d’in project cun caracter regiunal, scriva la vischnanca da Samedan en ina communicaziun.
Independentamain dal fatg che Samedan valitescha la schanza sco project communal da San Murezzan, na fiss Samedan era betg abel da sustegnair ina nova schanza, che custass nov var 20 milliuns francs. Quai causa la planisaziun da finanzas limitada da Samedan.
1 / 2
Legenda:
La schanza veglia a San Murezzan
La schanza veglia ha stuì ceder ad in proget nouv.
RTR
2 / 2
Legenda:
En ina segunda votaziun aveva la populaziun da San Murezzan ditg da schi ad in credit da 12 milliuns francs.
RTR
