Sco quai che la suprastanza communala da S-chanf scriva en sia communicaziun, saja ella vegnida a la conclusiun ch’il selvicultur dispensà duai turnar sco manader da la Resgia e la deponia Bos-chetta Plauna. Quai ord plirs motivs.
Dad ina vart valia anc adina la presumziun d’innocenza per il selvicultur da S-chanf. Ultra da quai è la suprastanza communala vegnida a la conclusiun ch’i saja ina situaziun insupportabla per tut ils involvids. Surtut en vista a quai, che las examinaziuns dal cas pendent pudessan durar anc dus fin trais onns.
Il president communal da S-chanf, Riet Campell n'ha betg vulì prender posiziun en chaussa. Il motiv saja ch'i sa tractia d'in tema delicat.
Ina emprima reacziun sin l'agir da la suprastanza communala, datti entant en furma d'ina petiziun lantschada ord la populaziun da S-chanf. Quella pretenda dapli transparenza tar l'examinaziun interna areguard las parts dal rapport administrativ ch'eran vegnidas publitgadas il december 2019.
Stut da questas novas èn er ils commembers da la cumissiun da gestiun. Er els sajan vegnids infurmads al medem mument sco las medias cun la communicaziun uffiziala da la vischnanca davart la re-installaziun dal selvicultur.
Entant è er vegnì activ l'uffizi chantunal da vischnancas ed ha instradà emprimas examinaziuns. Quai ha confermà il manader da l'uffizi, Thomas Kollegger, ad RTR.
L’atun passà è il selvicultur da S-chanf vegnì dispensà ad interim causa supposiziuns d’irregularitads en la gestiun forestala. En il fratemp è en vigur ina inquisiziun penala encunter la persuna dal selvicultur, quai ha tenor infurmaziuns da la procura publica.
