Siglir tar il cuntegn

Header

Sguard tras il vitg da S-chanf, la via cun salascheda, chasas engiadinaisas e tut davant il clutger.
Legenda: Il vitg da S-chanf. Keystone
cuntegn

S-chanf Presidents n'han betg retratg remuneraziuns illegalas

A questa conclusiun vegn il rapport final davart l'iniziativa ch'ha pretendì d'examinar pajaments a totalmain trais presidents communals ils ultims 10 onns. La radunanza communala ha approvà il rapport mesemna saira cun 27 cunter 15 vuschs, tar 4 abstenziuns.

En il center steva la dumonda, sche ils presidents communals Romedi Arquint e Duri Campell hajan retratg ils ultims 10 onns remuneraziuns e spaisas che na sa cunfan betg cun il reglament da salarisaziun da la vischnanca. Las remuneraziuns e spaisas dal president actual Gian Fadri Largiadèr n'èn anc betg pajadas ora, perquai n'èn quellas betg vegnidas prendidas sut la marella.

Giurist cunter iniziant

Il giurist Marco Toller e la cumissiun da gestiun èn vegnids a la conclusiun che tut ils pajaments sa cunfan cun il reglament. Quel prevesa ch'il president communal na survegn naginas indemnisaziuns per sesidas da la suprastanza e per radunanzas communalas, dentant bain per sesidas externas.

Precis quai avevan ils iniziants enturn Jon Peider Lemm mess en dumonda. Tenor els prevesa il reglament ch'il president communal n'ha da bun naginas indemnisaziuns per sesidas.

In reglament midà?

Suenter la preschentaziun dal rapport final hai dà ina lunga e viva discussiun tranter il giurist e l'iniziant. Punct da stgarpitsch è per l'iniziant ch'il reglament saja vegnì midà en il decurs dals onns. Il rapport final sa basia damai sin il reglament che sa chattia actualmain sin la pagina d'internet da S-chanf e betg sin quel dal 2007, sin la quala l'iniziativa pretendeva da sa basar. Cun quai saja il rapport manglus.

La radunanza communala ha tuttina approvà il rapport final. Igl è dentant vegnì giavischà da sclerir tgi che ha midà il reglament e da communitgar quai.

RR novitads 06:00