Il nov president communal da S-chanf ha cumenzà sia lavur senza contabilist e senza chanzlist. Quai causa in grond midament da persunal en l’administraziun e l'executiva. Vitiers vegn il fatg, che curt avant il cumenzament d'uffizi è vegnì publitgà il protocol da l'ultima seduta da la veglia suprastanza communala. Quella mussa emprims resultats da l’examinaziun administrativa interna areguard la gestiun forestala e ses conturn.
Sco ch'ins po leger en il protocol ha l’examinatur incumbensà da la vischnanca infurmà la suprastanza davart grondas mancanzas tar la direcziun e tar l’andament durant ils onns 2014 fin 2018. Per quest motiv recumonda el a la vischnanca d'introducir la procedura da dretg. Tras la surdada d'uffizi ha la nova suprastanza uss survegnì l'incumbensa da trair las proximas decisiuns en chaussa. Dentant pudessi esser ch'intgins commembers da la nova suprastanza n'han betg la cumpetenza da decider en chaussa. Quatter dals sis commembers pudessan numnadamain avair in conflict d’interess.
- Il nov president communal è il frar dal president communal dals onns 2011 fin 2016.
- L'oriund revisur da la vischnanca da S-chanf è dapi l'onn nov vicepresident. I vegn mess en dumonda, sch'el ha exequì dal 2014 fin 2018 ses mandat da revisur confurm a la legislaziun.
- In dals novs suprastants communals è stà chanzlist da la vischnanca tranter auter er durant ils onns 2014 fin 2016.
- In auter dals novs suprastants è il figliaster d'in anteriur suprastant
Pass concrets co ch'ins vul ir vinavant n’èn actualmain betg enconuschents. La vischnanca na vul per il mument numnadamain betg prender posiziun en chaussa.
Per tut ils inculpads vala vinavant la presumziun d’innocenza.
RTR actualitad 12:00
