Suenter che la vischnanca da S-chanf ha dispensà l’atun passà il selvicultur per immediat ha la vischnanca incumbensà in biro extern per in’examinaziun administrativa. Quel ha prendì sut la marella diversas fatschentas da S-chanf ed è uss vegnì tar emprims resultats.
Diversas mancanzas e manipulaziuns
Tranter auter è l’examinaziun vegnida tar il fatg, ch'i haja dà mancanzas tar la direcziun da la gestiun forestala e tar l’andament da la vischnanca durant ils onns 2014 fin 2018. Tenor il protocol da la suprastanza communala hai dà manipulaziuns da la cassa e cun daners bluts ed er mancanzas tar il process da la facturaziun da la resgia ed il giud da l’inventar da la resgia vegnan numnads concret. En divers process centrals mancan però las documentaziuns internas e las controllas adattadas per evitar tals sbagls. Tenor il protocol da la suprastanza na vegnia il rapport dentant anc betg preschentà public pervia da l'influenza sin retschertgas pendentas.
Lavur dal revisur extern vegn messa en dumonda
Vinavant metta il rapport en dumonda sch’il revisur haja fatg ses mandat cun la maniera usitada da branscha e confurm a la legislaziun.
Surdada a la nova suprastanza
Per la fin da l’onn 2019 è quasi l'entira suprastanza communala da S-chanf sa retratga ed ha tras quai surdà la fatschenta a la suprastanza nov elegida. Tenor il protocol renda la suprastanza veglia attent da prender recusaziun per commembers d’autoritads.
Per inculpads vala vinavant la presumziun d’innocenza.
RTR, actualitad 17:00
