Rico Lamprecht da la Partida burgais democratica PBD è il deputà da la Val Müstair en il Cussegl grond e lavura sco pur biologic. L'um da 51 onns è bab da famiglia, è en la suprastanza da l'uniun da purs grischuna, president da la Socità Agricula Val Müstair e mainafatschenta da l'Agricultura jaura GmbH. Plinavant è Rico Lamprecht stà 11 onns en la suprastanza communala da Sta. Maria/Val Müstair.
Gabriella Binkert-Becchetti tira consequenzas
Sco quai che Gabriella Binkert-Becchetti ha ditg envers Radiotelevisiun Svizra Rumantscha sa retira ella dal tuttafatg da la politica regiunala. Uschè ch'ella candidescha betg per in post en la suprastanza. En avegnir vul ella sa concentrar pli fitg sin ses affars privats, di Binkert-Becchetti. Presidenta da l'uniun commerzi e masteranza resta Gabriella Binkert-Becchetti vinavant. L'emna che vegn vul ella dentant dar enconuschent sche bain ella sa retira era sco presidenta dal PPS Val Müstair.
Economia e turissem sco puncts centrals
Sin il sectur da l'economia èsi impurtant per Rico Lamprecht da realisar il project da svilup regiunal cun ina nova chascharia, in local per mazzar, elavurar charn ed in local per l'elavuraziun da graun. Uschia possia la Val Müstair generar plazzas da lavur per giuvens indigens ed exportar agens products.
Turisticamain vul Lamprecht promover in resort cun radund 400 letgs a Tschierv e renovar ils implants da skis da Minschuns.
Elecziun da cumbat en l'entira suprastanza communala
Ils ulteriurs sis commembers da la suprastanza communala vegnan elegids ils 6 da november 2016. Per ils sis posts datti 10 candidats: quatter suprastants en uffizi e sis candidats novs. Ils numns dals candidats: Gian Duri Conrad (fin qua), Gian Tschenett (fin qua), Aldo Rodigari (fin qua), Aldo Pitsch (fin qua), Cla Filip Pitsch (nov), Jon Lamprecht (nov), Daniel Andri (nov), Roman Federspiel (nov), Hansjörg Weber (nov) e Remo Cologna (nov).
Ils resultats dal prim scrutini (25 da settember 2016)
- Rico Lamprecht da la PBD cuntanscha 377 vuschs.
- Gabriella Binkert Becchetti dal PPS fa 335 vuschs.
- Josef Hohenegger ha survegnì 48 vuschs. Quai tar in pli absolut da 386 vuschs.
Be nov vuschs sut il pli absolut
A Rico Lamprecht han mancà be nov vuschs per ina elecziun. El gudogna il prim scrutini cun 42 vuschs avantatg sin Gabriella Binkert-Becchetti.
Entant ha Josef Hohenegger declerà vers RTR, da betg candidar pli en il segund scrutini dals 16 d'october 2016. Uschia ch'i restan anc Rico Lamprecht e Gabriella Binkert Becchetti.
RR novitads 12:00+