Siglir tar il cuntegn

Engiadina Revival dal maraton dad Inline en Engiadina

Suenter che l’ultima cursa dal Swiss Inline Cup è stada il 2009, ha uss in nov comité d’organisaziun instradà ed organisà puspè la cursa tradiziunala sin rodas da Malögia a S-chanf.

rollerblades
Legenda: Bun 450 curriduras e curridurs èn s'annunziads fin uss per il maraton dad inline en Engiadina. pontresina.ch

Surtut difficultads en las structuras d’organisaziun e la finanziaziun da la cuppa avevan finalmain fatg svanir l’occurrenza svizra per in pèr onns, ha declerà Martin Berthod, il manader dal secretariat da sport San Murezzan.

Uss vul ins puspè reactivar la cursa. Bun 450 persunas èn entant s’annunziadas per la cursa finala da la Swiss-Skate-Tour la dumengia ils 13 da settember 2015.

L’organisaziun da la cursa è en ils mauns da la Swiss Skate Tour ed ha er da vegnir purtada finanzialmain da quella. Quai saja stada ina premissa che las vischnancas tranter Malögia e S-chanf hajan pretendì per dar glisch verda a la cursa.

Che la cursa n’è betg pli la sonda saira, mabain la dumengia bun’ura, deplorescha Berthod in pau. Il punct culminant dal inline maraton, saja numnadamain adina stà la festa finala la sonda saira a San Murezzan.