Las trais vischnancas en Engiadin’Ota –Segl, Silvaplauna e San Murezzan – sustegnan il plan da collavurar pli stretg. Quai giavischa ina maioritad da 47% da las abitantas e dals abitants, sco i resulta d’ina retschertga consultativa ch’è vegnida fatga quest december. Per ina fusiun da las trais vischnancas èn 22% s’exprimids. 16% giavischassan ina fusiun da l'entira Engiadin'Ota e 13% da restar tar il status quo.
En tuttas parts dumandadas vegn sustegnì d'ina maioritad ina collavuraziun pli stretga. Uschia per exempel tar la polizia da vischnanca, ils pumpiers, tar la selvicultura ed er tar il provediment d'energia. Tar la scola èsi be ina minoritad che vul ina collavuraziun pli stretga. 67% èn da l'avis ch'il status quo duai restar.
Recumandaziun da la gruppa da lavur
La gruppa da lavur, che è vegnida accumpagnada da la Scola auta spezialisada FHGR propona, in basa da questa retschertga consultativa, a las suprastanzas communalas da proseguir cun ina collavuraziun pli stretga en las spartas forestal, energia, polizia e pumpiers. Plinavant propona la gruppa da lavur d’examinar bainprest era ina collavuraziun stretga en il servetsch tecnic.
La gruppa da lavur e persvasa che ina collavuraziun da las trais vischnancas stoppia vegnir pli effizienta per accumplir tut las lavurs communalas.