Siglir tar il cuntegn

Header

Navigaziun

Legenda: Guardar il video La presidenta communala sto ir. Durada 01:59 minutas.
Or da Telesguard dals 26.09.2016.
cuntegn

Engiadina Resultat d'elecziun ha surprendì tuts a Bever

Che la malcuntentientscha cun l’agir da la suprastanza actuala da Bever era preschenta en vischnanca, demussa il resultat da l’elecziun. Che la differenza da vuschs fiss en tala maniera auta, avessan ils pli paucs fatg quint.

Ch’ina midada fetschia da basegn tar l’autoritad communala da Bever, saja gia pli ditg in tema en vischnanca han declerà pliras persunas dumandadas dad RTR sin via. En in microfon u davant ina camera han dentant be paucs vulì prender posiziun.

Sconfitta per tut la suprastanza

Surtut la mancanza d’ina communicaziun clara ed averta vegn crititgada e numnada sco in dils puncts principals per il debachel a Bever. Quai saja finalmain er la raschun ch’i vegn a dar er ina roschada tar ils commembers da la suprastanza da Bever, uschè il tenor tar ils passants sin via.

Respect dal pensum

Per Fadri Guidon, che succeda l'emprim da schaner 2017 a Ladina Meyer, signifitga l’uffizi da president communal er ina gronda sfida. Il pli grond respect haja el dal volumen da la lavur che spetgia el. Difficil vegnia er ad esser tenor il magister e pur, dad accumplir tut las aspectativas che la populaziun ha uss envers la nova suprastanza communala.

Il suveran da Bever ha elegì cun 209 vuschs Fadri Guidon sco nov president communal per il trienni 2017-2019. La presidenta en uffizi, Ladina Meyer, ha cuntanschì be 78 vuschs. Ultra da quai han era dus commembers da la suprastanza da rumir lur sez per la fin da l’onn.