Siglir tar il cuntegn
Inhalt

Engiadina Renovà staziuns d'auta tensiun Pradella ed Ova Spin

Las Ouvras Electricas d'Engiadina OEE han preparà las staziuns d'auta tensiun da Pradella ed Ova Spin per la gestiun cun 110 kilovolt

centrala da las ovras electricas
Legenda: La centrala da las Ouvras Electricas d'Engiadina OEE a Pradella sper Scuol ANR/Romana Duschletta
transformatur
Legenda: Il nov transformatur da 110 kilovolt ad Ova Spin Ouvras Electricas d'Engiadina OEE

Las Ouvras Electricas d'Engiadina OEE han renovà las staziuns d'auta tensiun a Pradella sper Scuol e ad Ova Spin vid il Pass dal Fuorn. Quai è ina etappa impurtanta da las lavurs da renovaziun da l'infrastructura da la rait scrivan las OEE. La lingia d'auta tensiun libra existenta da 220 kilovolt vegn ussa gestiunada nov cun 110 kilovolt. Las OEE hajan midà la tensiun da 220 kilovolt sin 110 kilovolt pervia ch'ins haja stuì renovar ils indrizs vegls. Quai ha ditg il manader da projects e logistica da las OEE Heinz Gross envers Radiotelevisiun Svizra Rumantscha RTR .Las OEE scrivan che las lavurs enfin ussa hajan custà 17 milliuns francs.

indriz da distribuziun
Legenda: Il nov indrizs da distribuziun da 110 kilovolt a Pradella Ouvras Electricas d'Engiadina

Il proxim pass impurtant per las OEE è ussa da metter sut terra la lingia nova da 110 kilovolt. Uschia vegnia la segirezza da provediment pli auta. Quai pervia che la lingia n'è lura pli exposta a vent, naiv u per exempel a bostga che croda sin la lingia. Era l'aspect che la lingia na saja betg pli visibla saja in factur impurtant. En pli vegnian uschia era ils custs da manteniment pli bas.

Project "Svilup da la rait Engiadina"

La renovaziun da las staziuns d'auta tensiun Pradella ed Ova Spin fa part dal project "Svilup da la rait Engiadina". Enfin l'onn 2020 duai era la lingia d'auta tensiun da 110 kilovolt tranter Pradella e Bever vegnir renovada e messa sut terra. Ils custs per il rest dal project "Svilup da la rait Engiadina" s'amuntan ad 82 milliuns francs.

La lingia internaziunala d'auta tensiun da 380 kilovolt vegn rinforzada e resta sur terra. Quai è in project da la Swissgrid.