Siglir tar il cuntegn
Inhalt

Engiadina Rendaquint da Zuoz serra meglier che spetgà

Il quint annual 2014 da la vischnanca da Zuoz serra cun in gudogn da 7’485 francs. Fatg quint vev ins cun in minus da 45’600 francs.

clutger da Zuoz
Legenda: Cifras allegraivlas per l'onn da gestiun 2014 a Zuoz A. Caprez

Quel resultat allegraivel haja da far cun la buna disciplina tar las expensas, ma er cun entradas da taglia pli autas sco planisà, scriva il cussegl communal en la missiva.

Vendita da la parcella 1214

Ils votants da Zuoz han er da decider davart la vendita d’ina parcella nua che l’anteriura staziun da val dal runal Albanas era. La finamira è da vender il terren ad indigens per fabritgar abitaziuns primaras ed uschia almain cuntanscher il pretsch investì da radund 2 milliuns francs.

Elecziun da Chalandamarz, en uffizi trais mais pli tard

Plinavant ha la radunanza communala dad approvar ina revisiun parziala da la constituziun. Tranter auter duai midar il cumenzament dal temp d’uffizi dals 2 mars sin ils 1. da fanadur. Cun quest adattaziun vul il cussegl communal pussibilitar la tscherna da candidats che dovran anc in tschert temp per s’organisar en lur plazza da lavur.

Ils votants da Zuoz han ultra da quai er dad approvar ils statuts per la nova regiun Malögia a la radunanza communala dals 29 d’avrigl 2015. (RTR/ac)