Siglir tar il cuntegn

Header

Navigaziun

grip cun crappa ed aua
Legenda: Il material en la Val Schais è per gronda part grip da gip. mad
cuntegn

Engiadina Rempar da la Val Schais en Val Müstair vegn sanà

La regenza grischuna ha approvà il project per sanar il rempar da la Val Schais cun intginas cundiziuns sco er cun las permissiuns spezialas.

La Confederaziun ed il chantun sa participeschan a la finanziaziun cun contribuziuns per la correcziun dals curs d'aua. La contribuziun federala importa 358’750 francs e la contribuziun chantunala 205’000 francs.

Supplementarmain sa participescha il chantun cun ina contribuziun per la construcziun da vias da 153’750 francs. Il project custa en tut radund 1 milliun francs. Per la vischnanca Val Müstair restan radund 300'000 francs. La radunanza communala sto anc deliberar quel credit.

Rempar protegia Sta. Maria

Tras la Val Schais curra in torrent che po chaschunar bovas e che periclitescha – ensemen cun la Muranzina – il territori dal vitg da Sta. Maria cun aua gronda. Il curs natiral da l'aual da la Val Schais è gia vegnì svià en direcziun nordvest.

Il sviament dal curs da l'aual è sa cumprovà da princip. Il chanal da sviament artifizial è en il fratemp vegnì donnegià da las bovas ch'èn adina puspè vegnidas giu.

Perquai ha la vischnanca da Val Müstair l'intenziun da sanar quest rempar.