Siglir tar il cuntegn
cuntegn

Engiadina Regurdientschas a concerts specials – Prefix preschenta DVD

Ina giada sin il palc grond, ina giada amez la zona da peduns ha Prefix pudì sunar durant il Campiunadi mundial da skis a San Murezzan. Tuts dus concerts ha la band da rock engiadinaisa laschà filmar. Il DVD è uss pront e vegn preschentà en sonda cun ina gronda festa a Zuoz.

Prefix en lur stanza d'exercizi a Zuoz, ina stanza pitschna cun in tapet cotschen e paraids protegidas cun ina sort da tapet brin.. Da sanestra: Curdin Urech (ghitarra), Marco Niggli (Keyboard), Andri Casty (chantadur), Rico Puorger (ghitarra), Christoph Casty (bass). Betg sin la fotografia è il battarist Fredy Muriset.
Legenda: Prefix en lur stanza d'exercizi a Zuoz. RTR, Anna Caprez

La band Prefix è vegnida fundada dal 1999, dapi il 2005 suna ella en la furmaziun actuala: il battarist Fredy Muriset, il keyboarder Marco Niggli, il bassist Christoph Casty, ils dus ghitarrists Rico Puorger e Curdin Urech ed il chantadur Andri Casty.

Els dian da sai sez, ch'els sajan ina band da restads giuvens che sa scuntran duas giadas l'emna per far musica da rock rumantsch ensemen.

DVD sco algordanza

Per realisar il DVD han ils sis umens organisà in'acziun da crowdfunding e sponsurs. Ed er sche nagin fetschia pli DVDs oz hajan els vulì stampar lur regurdientschas als concerts durant il Campiunadi mundial da skis a San Murezzan sin in DVD, di il chantadur.

Preschentà vegn quel questa sonda cun ina gronda festa a Zuoz e cun sustegn dad ulteriuras bands engiadinaisas: ils Cervoholics, Dörti Karpet ed ils Rebels.

RR actualitad 07:20