Siglir tar il cuntegn
cuntegn

Engiadina Regenza dat glisch verda per nov hotel a Segl

Cun approvar la revisiun da la planisaziun locala da la vischnanca da Segl stgaffescha la regenza la basa per construir in hotel tar la staziun da val da la pendiculara Furtschellas.

lai cun project
Legenda: Il project d'in nov hotel è previs sper la staziun da val da las pendicularas Furtschellas a Segl. Comet Photoshopping ScRL / Dieter Enz

Per garantir ina separaziun territoriala clera tranter l’hotel planisà ed il manaschi forestal cunfinant vegnan adattadas las zonas existentas, scriva la regenza en sia communicaziun.

Finalmain in pass pli enavant

Il project sin 8’000 meters quadrats prevesa in hotel cun maximalmain 150 stanzas dublas e 420 parcadis. Cun il gea da la regenza possian ins uss cumenzar a far plans pli concrets. Tgi che vegn a finanziar il project, na saja anc betg enconuschent, uschè Markus Moser, il directur da las pendicularas Corvatsch/Furtschellas.

Spustament da pista

Per ch’il manaschi forestal na vegnia betg disturbà da skiunzas e skiunzs vegn la pista che maina giu la val ultra da quai spustada en il sectur da la staziun da val.

Parcadis sutterrans

Plinavant intimescha la regenza la vischnanca da Segl da procurar, en il rom da la procedura per la permissiun da construcziun, ch'i vegnia construì uschè bleras plazzas da parcar sco pussaivel sut terra.

Il project avev’ins lantschà gia avant 15 onns. Adina puspè era quel vegnì adattà a las circumstanzas actualas.