Recurs encunter Serletta sid

Ils hotels Kulm e Palace han fatg recurs encunter la revisiun parziala da la planisaziun locala Serletta sid a San Murezzan.

San Murezzan

Legenda da maletgs: Serletta sid a San Murezzan cun ils hotels Palace e Kulm. Vista vers ils hotels Palace (san.) e Kulm (dretg) a San Murezzan. Serletta sid è tranter ils dus hotels. swiss-image.ch

Sco quai che Jörg Röthlisberger, il pledader dals hotels Kulm e Palace ha ditg envers Radiotelevisiun Svizra Rumantscha RTR, hajan ils dus hotels pertutgads fatg in recurs da planisaziun encunter la revisiun parziala da la planisaziun locala. Questa revisiun parziala duai pussibilitar ina realisaziun d’in nov hotel da sanadad ed il nov dachasa per la Clinica Gut sin l'areal Serletta sid a San Murezzan.

Ils medems motivs

Ils motivs dals dus hotels èn anc ils medems sco avant la votaziun communala dals 18 d'october 2015. Els vulan avair examinà sche la planisaziun decidida da la populaziun correspunda en tut ils puncts a la lescha. La populaziun da San Murezzan aveva ditg gea cun gronda maioritad a la planisaziun a Serletta sid.

Plirs recurs

Era la vischnanca da San Murezzan conferma envers RTR, ch'i sajan entrads plirs recurs encunter la revisiun parziala da la planisaziun locala Serletta sid. La vischnanca sto ussa prender en consultaziun mintga singul recurs. Sin la fin da schaner è planisada ina infurmaziun pli detagliada per la publicitad.

RR Novitads 20.00