Tenor la communicaziun dals dus hotels a las medias na correspundian las dimensiuns e l’entira planisaziun dal nov hotel da sanadad betg al svilup spetgà per San Murezzan.
Da princip beneventian ils hotels Kulm e Badrutt's Palace in hotel da sanadad – ma sulet en ina varianta redimensiunada. Er il svilup dals dus hotels stoppia esser pussaivel e cun la lubientscha da pudair construir bajetgs d’ina autezza da 30 meters saja quest svilup impedì.
La clinica Gut ha spetgà quest pass
Il CEO da la clinica Gut Adrian Urfer n’è betg surprais da quest pass. Per el sa tracti qua d’ina tactica per prolungar il temp. Malgrà la situaziun è persvadì Adrian Urfer da chattar anc ina schliaziun. El prevesa da contactar ils hotels Kulm e Badrutt’s Palace per discutar la situaziun ina giada senza giurists.
Il pledader dals dus hotels, Jörg Röthlisberger, n’ha betg vuli prender posiziun. Il project è ussa davant la dretgira administrativa dal chantun Grischun.
RR actualitad 12:00
