Siglir tar il cuntegn
Inhalt

Engiadina Record da participants per il giubileum da 30 onns

135 persunas s’han inscrittas quest onn per ils curs da rumantsch a Scuol, uschè bleras sco anc mai. Plaunet sajan ins al limit da las capacitads, per metter tut sut tetg durant in’emna.

sala plain glieud
Legenda: Sala plaina l'emprim di dals curs da rumantsch 2017 a Scuol. RTR, Anna Caprez

Cuntents sajan els dentant dal grond interess per la lingua, ha suttastritgà Mario Pult da la Lia Rumantscha ch'organisescha il curs da rumantsch. Cun agid da 13 magistras e magisters pon els er porscher lecziuns adattadas als basegns e capacitads dals participants.

Nagin sacrifizi per in magister

D’instruir la lingua rumantscha durant las vacanzas da scola n’è nagin chasti e n'era nagin sacrifizi per ils magisters. Tuts fetschian quai voluntari e cun gronda passiun per la lingua rumantscha.

I dess rauba pli lucrativa che d'instruir als curs da rumantsch, dentant èsi immens impurtant da mussar nossa lingua.
Autur: Chasper Stuppanmagister da Tschierv
Chasper Stuppan
Legenda: Chasper Stuppan, in dals 13 magisters che s'engaschan als curs da rumantsch a Scuol. RTR, Anna Caprez

Creschids empè d’uffants

Surtut il fatg ch’ins possia instruir glieud creschida empè dad uffants, dettia anc ina giada tut in’autra perspectiva als magisters, uschia Mario Pult. Quai saja pil solit er il motiv ch'el n'ha mai difficultads da chattar glieud che vegn ad instruir ils curs da rumantsch a Scuol.

Documents ids a perder

Lantschà l’idea da porscher a giasts ed indigens curs da rumantsch intensivs aveva Jacques Guidon avant 30 onns. Cun quants participants che l’emprim onn aveva cumenzà na possian ins betg pli dir precis, cun quai ch’ils documents sajan svanids, ha declerà il collavuratur da la Lia Rumantscha Mario Pult.

Mario Pult cun dunna
Legenda: Mario Pult vi dal sclerir ils davos detagls per l'emprima lecziun da rumantsch. RTR, Anna Caprez

RR actualitad 07:00