Siglir tar il cuntegn

Header

cuntegn

Engiadina Realisar siemis suenter las nauschas novas

David Spinnler, correspundent Engiadina

Igl è ina da quellas novitads nua ch’ins sto sa piztgar en il bratsch per guardar sch’igl n’è betg mo in siemi. Ch’i na giaja betg bain cun l’Institut Otalpin a Ftan, quai era cler. Ma ch’i va talmain mal, ch’ins sto gist serrar las portas, quai è propi stà ina surpraisa. Ed in orrur per tut quels ch’èn i a scola sin «l’Insti», co che l’Institut è vegnì numnà. Ed in orrur per ils geniturs ed ina situaziun fitg difficila per tut quels che han gudagnà il paun da mintgadi en l’Istitut Otalpin.

audio
Mezdi: L'Institut Otalpin sto serrar – in commentari
ord Actualitad dals 22.07.2015.
laschar ir. Durada: 2 minutas 28 Secundas.

Dad ussa dar la culpa a politichers u al cussegl administrativ, u als uffants da l’internat che n’han betg sa cumportà adina «comme il faut» per dir quai decent – da dar la culpa a sai jau betg tgi tut – quai na porta nagut u gida forsa dad elavurar las primas emoziuns. Ma tge èsi lura da far? Acceptar che l’Engiadina Bassa perda sia scola media? Acceptar che 50 plazzas da lavur van a perder? Che l’attractivitad da la regiun sco lieu per viver ha ussa in grond plus damain?

Dat quai ina da quellas istorgias nua ch’ins di bainbaud: «Ma – i han fatg sbagls – tge vuls?» e finì? Il privel ch’i va uschia e che l’Institut Otalpin è bainbaud be anc ina muschna, quest privel è grond. L’onn 2015 va lura en las annalas sco onn catastrofal per l’Engiadina Bassa e per la Val Müstair: perdì il label Unesco da la Biosfera. L’hotel Schweizerhof a Vulpera che resta ussa bain avert per ina ulteriura stagiun d’enviern – ma tge capita vinavant? Ed ussa anc l’Institut Otalpin che serra las portas.

I resta be da siemiar: E jau hai gì fitg in bel siemi questa notg. Igl era il prim d’avust. Ed en Engiadina Bassa èn idas millis da persunas sin via ed era ils fieus sin las muntognas han be ars per demonstrar: Nus vulain mantegnair nossa scola media e las plazzas da lavur. Nus tegnain qua noss scolars e na als tramettain betg en autras regiuns. Nus na schain betg a noss scolars da far meglier da restar en il stgalim superiur era sche quels fissan clevers avunda per far il gimnasi en la regiun.

E sur muntogna via, en Val Müstair datti era ina demonstraziun: 1000 jauers sin via. Nus vulain salvar il label Unesco! Nus essan buns da realisar ina Biosfera che correspunda als criteris. Era suenter la decisiun encunter la zona da tgira, Nus faschain quai! Quai è bain in bel siemi – u betg? Il prim d’avust ma piztg jau lura en il bratsch per guardar sch’igl è propi be in siemi.

Artitgels legids il pli savens