Siglir tar il cuntegn

Header

dunna che ha in faziel blau cun broscha sin il chau
Legenda: Il faziel na saja betg ina prescripziun da l'Islam, Monica Gutierrez sa senta simplamain pli bain cun. RTR, Anna Caprez
cuntegn

Rassissem en Grischun «A mai hani er gia spidà en fatscha»

Dapi ch’ella ha 24 onns viva l’Engiadinaisa cun la cretta da l’Islam en ses cor. Quai di Monica Gutierrez El Ôrf, oriundamain da Schlarigna, entant abita ella cun sia famiglia dapi blers onns a Samedan. Suenter esser sortida da la baselgia catolica saja ella stada plirs onns en tschertga. Grazia a siemis saja ella finalmain vegnida tar l'Islam.

Portar il faziel da chau signifitga per mai er ina sort protecziun. Senza ma sent jau sco blutta.
Autur: Monica Gutierrez El ÔrfSamedan

Las reacziuns cura che la mamma da duas figlias ha cumenzà a trair en il faziel da chau sajan stadas fitg differentas. Entant ch’ina part da ses amis ed enconuschents hajan simplamain acceptà la nova apparientscha, hajan auters interrut cumplettamain il contact cun ella.

Anc oz datti glieud che mida vart sin via u che evitescha da vegnir cun mai en in ascensur.
Autur: AminaMuslima, Samedan

Che la dunna da 39 onns è convertida dal catolicissem a l’islam, saja stà in process pli lung, durant quel saja ella adina stada en la tschertga. Entant porta ella er il num «Amina», ch’ella ha tschernì ensemen cun ses um, in Berb. Ch’ella pratitgeschia la religiun adattada a sia vita, cun desister sin charn portg ed alcohol. Dentant ura ella cur ch’ella sez ha temp e plaschair.

Evitar conflicts

Avant stgars in onn ha Monica Gutierrez El Ôrf avert la «Crapenda Brocki» a Samedan. Ils clients serva ella, uschia ha la dunna allegra decis, senza faziel da chau. Quai per evitar situaziuns da retegnientschas u pregiudizis.

L’ingiustia envers minoritads culturalas, religiusas saja adina puspè er in tema en lur famiglia. Ils cussegls che la mamma po dar a sias duas figlias da 16 e trais onns èn adina ils medems: viver e laschar viver e cumbatter il rassissem.

RR actualitad 11:00

Artitgels legids il pli savens

Ir a sanester Ir a dretg