La boxa da lain ch'è vegnida nizzegiada sco biro ha cumenzà ad arder la gievgia saira. Sco la Polizia chantunala rapporta, n'han ils pumpiers betg pudì franar il fieu. L'entira boxa da lain ha brischà. Ils pumpiers han dentant pudì evitar ch'il brischament sa derasia.
In vischin dal bajetg ha percurschì il fieu en la boxa ed alarmà ils pumpiers gievgia las 20:00. Suenter ch'ils pumpiers èn arrivads, èsi anc ì circa duas uras, lura saja la boxa brischada dal tuttafatg. Ils pumpiers han pudì salvar ils bajetgs vischinants dal fieu. Tar la fatschada ed il tetg da la chasa hai dentant dà donns.
La Polizia chantunala intercurescha co ch'ils donns han pudì schabegiar. Tar l'acziun da stizzar eran 40 persunas dals pumpiers involvidas.
