Nunenconuschents han rut en la fin d’emna passada en ina fatschenta ch'elavura laina a Valchava. Sco la pledadra da la Polizia chantunala Anita Senti ha declerà a RTR, na saja betg vegnì engulà insatge.
Pussaivel saja ch’ils laders sajan vegnids disturbads durant l’infracziun, suppona Senti. La polizia saja vid las retschertgas.
Gia avant 2 emnas avevan nunenconuschents rut en gist en 4 lieus en la Val Müstair, ed engulà daners d’ina summa da paucs millis da francs. Sinaquai aveva la polizia augmentà la preschientscha en la val.