Siglir tar il cuntegn

Header

video
Empatia per senioras e seniors a Puntraschigna
Or da RTR dals 28.03.2020.
laschar ir. Durada: 3 minutas 34 Secundas.
cuntegn

Puntraschigna Ureglias avertas per basegns en vischnanca

L'isolaziun è per tuts ina gronda sfida, per persunas sur 65 onns è ella anc pli pretensiusa. Esser sulet l'entir di cun ses patratgs e duairs po chaschunar problems, era psichics. Puntraschigna organisescha ussa in callcenter per senioras e seniors, quel vegn en funcziun a partir da glindesdi.

16 dunnas ed in um lavuran a partir da glindesdi sco telefonistas e telefonists en il callcenter, ch'è drizzà en il Rondo a Puntraschigna.

En blocs da quatter persunas telefoneschan els a tuttas e tuts sur 65 onns. Simplamain per baterlar in zichel, dentant era per dumandar sch’els possian gidar. Far cumissiuns, accumpagnar els tar in medi ubain gidar en auters fatgs.

Las telefonistas ed il telefonists èn persunas da Puntraschigna, students, persunas che na pon betg lavurar actualmain ubain era chasarinas e chasarins.

audio
Puntraschigna dumonda ses abitants co els han
ord Actualitad dals 31.03.2020.
laschar ir. Durada: 2 minutas 56 Secundas.

Il bainstar da tuttas e tuts, quai è in grond quità a Puntraschigna

En situaziuns da crisa vegn en acziun il stab directiv communal – quel consista da quatter persunas. Il stab da Puntraschigna ha decis, d'organisar quel callcenter per mussar solidaritad ed interess per tuttas e tuts da la vischnanca.

Ils seniors e las senioras èn per Puntraschigna fitg impurtants, precis quellas persunas han prestà in mantun per nus. Ussa è arrivà il temp per dar enavos insatge.
Autur: Thomas Walther president stab directiv communal

Ils custs per quest idea porta la vischnanca.

RTR actualitad

Artitgels legids il pli savens