Siglir tar il cuntegn

Engiadina Puntraschigna sustegna il Festival da Jazz

Sco emprima vischnanca insumma approvescha la suprastanza communala da Puntraschigna in sustegn finanzial garantì per il Festival da Jazz. La cunvegna da prestaziun sustegna l’occurrenza da renum mundial per ils proxims trais onns cun 60’000 francs mintg'onn.

Durant in concert dal Festival da Jazz en il Club Dracula.
Legenda: Il Festival da Jazz a San Murezzan ha pudì festivar il 2017 ses giubileum da 10 onns. Keystone

La vischnanca da Puntraschigna ed ils organisaturs dal Festival da Jazz èn sa cunvegnids ad in sustegn finanzial garantì da 180’000 francs sur ils proxims trais onns.

Era sche Puntraschigna ha adina puspè sustegnì il festival è quest in pass che permetta als organisaturs da pudair planisar l’occurrenza en avegnir cun dapli segirezza.

Quai è in signal che reflectescha la lavur dals ultims 10 onns, dentant duvrass quai da pli blers partenaris dal Festival da Jazz in tal sustegn.
Autur: Christian Jott Jennydirectur dal Festival da Jazz

Sco quai ch’il directur dal Festival da Jazz, Christian Jott Jenny ha ditg envers RTR saja questa decisiun fitg allegraivla ed in signal che reflectescha tut la lavur prestada durant ils ultims 10 onns.

In tal sustegn duvrass quai tenor el dentant da pli blers partenaris dal Festival da Jazz. La pretaisa saja gia dapi daditg sin maisa. Els sperian ussa ch'er vischnancas sco San Murezzan, il lieu da naschientscha dal festival, u er il chantun suondian.

Chattar sponsurs e donaturs è ina sfida

Malgrà il grond success dal festival ch'attira onn per onn ils gronds stars da la scena da Jazz, è la finanziaziun adina puspè stada ina gronda sfida per ils organisaturs. Els ston mintg'onn danovamain ir en tschertga da sponsurs e donaturs.

RR actualitad 17:00