Siglir tar il cuntegn

Engiadina Puntraschigna desista sin 50’000 francs

La vischnanca a Puntraschigna scriva giu 50’000 francs ch'eran previs per organisar eveniments da cultura.

Voices on Top a Puntraschigna dal 2012
Legenda: Voices on Top a Puntraschigna dal 2012 RTR

Realisar in eveniment cultural sin nivel naziunal ed internaziunal. Quai è stada l'idea e finamira che la vischnanca da Puntraschigna ha pajà anticipadamain 50’000 francs per far ina ScRL (Societad cun responsabladad limitada). En diversas discussiuns tranter la vischnanca ed ils promoturs da la ScRL èsi vegnì discutà sur da pliras propostas, co organisar e realisar eveniments. Discurs che n'han però betg purtà fritg.

Uschia ha la vischnanca da Puntraschigna decidì da sistir il project e pretendì da restituir l’import da 50’000 francs. Ina discussiun da mediaziun n’ha betg purtà fritg, uschia che la vischnanca ha gì anc l'unica opziun da clamar il tribunal.

La vischnanca desista sin la procedura da dretg civil

Pretender l’import sin la procedura da dretg na vegn per la vischnanca betg en dumonda. La vischnanca ristgass – tenor agen parairi giuridic – il concurs da la ScRL, e ch'ella stuessi la finala eventualmain anc surprender ils custs da la dretgira e d’advocatura.

Eventuala procedura penala

Il cussegl communal ha decis da desister da proseguir la procedura da dretg civil. Sche la vischnanca veglia instradar ina procedura pervi dad eventuala defraudaziun, saja anc betg decidì, communitgescha la vischnanca da Puntraschigna.

RR novitads 14:00